მეყვავილე სტარტაპერი ქალი ხულოდან

 მე ვარ მაია სურმანიძე, 40 წლის. ვცხოვრობ ხულოს მუნიციპალიტეტის სოფელ წაბლანაში. მყავს მეუღლე და სამი შვილი. ორი ვაჟი და ერთი ქალიშვილი. ოთხი წლის წინ გამიჩნდა იდეა  ვარდის ბაღი გამეშენებინა, რადგან თავიდანვე ვიყავი ყვავილების სილამაზით შეპყრობილი.  სიყვარულმა ნელა-ნელა იმატა და ბოლოს გადავწყვიტე გამეშენებინა ვარდი , გამეზარდა ბიზნესი და დამეწყო ცვლილებები ჩემი თემის ირგვლივ. თავდაპირველად, საზოგადოებამ არადამაჯერებლად მიიღო ეს იდეა, რადგან  წაბლანა მაღალმთიანი სოფელია, ამიტომ წარმოუდგენელად ეჩვენებოდათ თუ შეეგუებოდა ჰოლანდიური  ვარდის ჯიში ჩვენს კლიმატს.

 

   მიუხედავად საზოგადოების დამოკიდებულებისა, ჩემი იდეა მაინც განვახორციელე და დავრგე 150 ძირი ბლექმეჯიკი ჰოლანდიური ჯიშის ვარდი. ამ საქმიანობის შედეგად მიღებულმა ცოდნამ, გამოცდილებამ და იმ გარემოებამ, რომ აღნიშნული ვარდი ჩვენს კლიმატს არაჩვეულებრივად შეეგუა, მომცა საშუალება, რომ  ეს საქმიანობა გამეფართოებინა.ამჟამად  მაქვს 2200 ძირი წითელი ბლექმეჯიკი, 800  ფერადი ჯიშის ვარდი, რომლებიც საკუთარი ფინანსებით შევიძინე. ჩემი ცვლილებები საზოგადოებასაც არ გამოპარვია და გარკვეული აღიარებაც მომიტანა.  პატარა ვარდის ბაღში საქმიანობა ძალიან მაბედნიერებს. აღნიშნულ ვარდების ბაღში  დასაქმებული მყავს სეზონურად  2 ადგილობრივი ქალი. ვარდი ყვავილობას იწყებას 25 მაისიდან და გრძელდება 15 ნოემბრამდე. 

 ჩემს სამომავლო გეგმებში შედის, რომ უახლოეს მომავლში გავაფართოვო მეურნეობა და  დავასაქმო ადგილობრივი მოსახლეობა. ასე ნელა ნელა გაჩნდება სამუშაო ადგილები, სოფლები გადარჩება დაცლას. ამ პროცესებში კი ერთმანეთის დახმარება და მხარდაჭერა მნიშვნელოვანია. 

ქალებს მოვუწოდებ დაფიქრდნენ, რისი გაკეთებაა შესაძლებელი თავის სოფელში.   წამოიწყონ სოფლის მეურნეობის ხაზით სოფლებში  ბიზნესი და გააშენონ ისეთი კულტურები როგორიცაა მარწყვი, ჟოლო, მაყვალი და ასე შემდეგ სხვა კულ ტურები. მინდა მოსახლეობამ ამ მიმართულებით აიმაღლოს ცნობიერება და დაინტერესდნენ სოფლის პროდუქტების ფინანსურ სარგებლიანობაზე. ასე,   მცირე და საშუალო ბიზნესის წამოწყებით, ერთმანეთის გაძლიერებით და მხარდაჭერით გავაძლიერებთ  თემს,  მუნიციპალიტეტს და ბოლოს  ჩვენს ქვეყანას.